هو ليه البنات بيحبوا الورد قوي كده؟

موضوع عجبنى اوى طريقة طرحه وهو عن اجمل شى فى الدنيا الورد ويارب يعجبكم

هو
ليه البنات بيحبوا الورد قوي كده؟ سؤال دائماً يتردد في دماغ الشباب
وبيكتفوا بالإجابة عليه بجملة تشفي غليلهم وهي "لأنهم تافهين وهُبل!" بس
خلينا نعلق الإجابة شوية سواء كانت عن الورد أو الدباديب ، وياريت نهدي
البنات إللي أكيد وشاطوا دلوقتي على كل الأولاد (أنا جاي أهدي النفوس مش
أكتر)
الإنسان
هو اللي بيضفي القيمة على الأشياء اللي بيملكها وليس العكس، يعني مثلاً لو
حد بتحبه موت أهداك دبدوب صغير وفي الوقت نفسه جاتلك هدية ذهب من حد مش
بتطيقه ... أي هدية هاتكون أغلى عندك الدبدوب رخيص الثمن غالي القيمة ولا
الذهب الغالي اللي مش بيمثللك أي قيمة ونفسك تولع فيه وفي صاحبه، هي دي
القيمة المقصودة واللي بتستمد قوتها من مصدرها (من الشخص اللي أهداها)
وظروفها المحيطة ونظرتك الشخصية للأشياء وإحساسك بيها. وإلى جانب أننا قد
نكتشف أن أبسط الأشياء ترضينا وإحنا مش عارفين، قد يظن البعض أنهم يحتاجون
لمياه البحر كلها لتشبعهم بحيث يحاولون جاهدين أخذها قفش كده بكل تطلع
وطمع لكن إن قدم لهم كوب من هذه المياه مغلف برقة ومحبوك بعناية سيرضوا به
وترتاح أساريرهم وده قانون عام ممكن تنقاس عليه كل الهدايا والأشياء اللي
بنملكها، أما بالنسبة لحكاية الورد بالذات الي بتتهبل عليه البنات ومحير
كل الأولاد فهي تتمحور ببساطة في أن الورد كائن جامع مانع شامل لكل معاني
الرقة والجمال والبساطة، عشان كده البنات بيحبوه وطبعا مش علشان هم رقاق
أو صوتهم مسرسع لأ ده مالهوش دعوة بتكوين البنات وطبيعتهم بدليل إن فيه
أولاد كتير بيقدروا قيمة الورد وبيحبوه على عكس الشائع عن أنهم جافين
وبيتعاملوا بخشونة مفرطة، إلى جانب إن فيه بنات بتكره الورد جداً جداً
وبتتقرف منه "عادي" دي أذواق زي اللبس كده بالضبط على العموم لازم تكون
حذر وأنت بتقدم الورد لأي حد يعني ممكن تقدمه لولد يبصلك باستهتار
واستهزاء وممكن تقدمه لبنت ترميه في وشك لأنها عندها حساسية منه أو تقولك
مش كنت تجيبلي بداله كيلو لب وسوداني أحسن (على أساس إنها قردة في
الجبلاية يعني). الورد أرق شيء في الكون بيخليك (حتى لو مش بتحبه) أول ما
تشوفه بألوانه البهيجة تعمل حاجات لا إرادية كتير ماكنتش تتوقع إنك تعملها
بكل السهولة دي يعني حتلاقي مثلاً خدودك اتكورت على جانبي وجهك، وامتدت
شفتاك بتقلص شديد ليسفر الأمر عن هذه الابتسامة الرقيقة التي لا تعرف
منبعها بعد أن تطلق عيناك ابتسامة أخرى تشارك الأولى فرحتها ... عرفتوا
بقى ليه البنات بيحبوا الورد يا ولاد؟ طبعاً مش عشان السبب إياه مش كده
... يارب تبارك في كل محلات الورد اللي عندنا وتبعد عنها الحوادث والحرائق
والتصادمات (ما كل حاجة في البلد فيها مصايب جات يعني على محلات الورد
بكره لا قدر الله تولع)، بجد مفيش أحلى من إنك تقوم من نومك الصبح (بعد
عكننة وقرف طوال) على ورود حمراء وصوت رقيق يقولك صباحك سكر.

مــــــــــــــنـــــــــــــــــــــقــــــــــــــــــول

ههههههههههههههههه
اللى كتبت الموضوع دة دماغها مطرقعة
بس جامدة
سلام

عجبنى طريقة طرح الموضوع

ميرسىى

نورت بمرورك الجميل